出發前的準備

         大家好!!
         原本今次係想問日本之旅的事,但是唔講一D嘢，我又覺得好似講D唔講D咁，所以今次再講多少少廢話，請大家容忍一下。(老人家就係咁多廢話啦!!)
         今次因為得一條友去日本東京，驚唔認得路，所以係出發果陣去搵下一D租WiFi的公司，發現現在真係有好多選擇，開頭搵到一間價錢唔錯的店舖，不過佢要我太早俾錢先可以借，所以唔幫襯佢，後來都係搵間大間又唔係好貴的公司去租(其實我睇咗咁多間，間間差唔多價錢)，跟住用電話聯絡，肯定係出發之前有機可以借，跟住就入數去佢地account，第二日攞半日假去攞機，果間公司都唔錯，叫維X數據的公司(你地想知數據，就上網搵啦! 唔太難搵)。  
        我用過速度唔錯，不過唔係度度都可以收到4G訊號，後來得知，原來佢地4G唔係度度都收到，所以你地想租，就要留意啦!!謂返我少少comment先，果舊嘢好細舊，不過大家你地用果陣，千萬唔好放係褲袋裹面，因為果舊嘢真係好熱吓!!辣親大家就唔好啦!!所以我會放係背囊入面，用果陣先開着。我試過長期開着，佢地舊嘢可以用到大約十個鍾左右，足夠大家一日旅程，如果大家怕唔夠電的話，你可以同佢地借舊後備電又或者自己買舊後備電(我就決定買後備電，因為我唔只叉佢果舊，仲有其他嘢要叉)。
         跟住緊係搵吓有咩app好用啦，我會推薦兩個app俾大家，第一個係叫"Y!乗車案內"，這個app主要係教你乘搭佢地果邊鐵路，因為日本果邊鐵路都幾複雜吓，有咗喱個app就可以跟住佢plan好的路線去乘搭日本所有鐵路，不過喱個app只可以俾日本apple store要搵得到，所以你自己要有日本account先好呀!!首先係要你輸入左你要去鐵路站名稱，有D地方名可能要輸入日本先認得，例如迪士尼果個車站，你地就要上網去做copy and paste，喱個app就有三個選擇俾到你,第一個叫"早到着時刻順"，喱個意思係解用最少時間果班車，跟住第二個選擇係叫"楽乗り換え回数順”，係解轉車次數最少，第三個係叫"安料金の安い順"，係解作用錢最少的乗車方案。第二個app係叫"日文旅行會話"，佢係係免費的，不過內容一D都唔差，差唔多你有機會用到嘅日文都包含哂，你用手指指住佢來用係可以，真係好方便!!

半年前的計劃

       我今次開個blog係為左記錄今次去日本東京之行的點點滴滴，所以會不定期update果九日行程。其實我一定到好想去日本一次，噤啱公司週年聚餐，我老闆俾左一萬蚊俾我做獎金，跟住我咪再儲D錢去囉(PS:儲果D錢主要係雙糧+花紅 )，總共儲左大約$26000左右作為旅費。
       因為我一年前俾女飛左，有一天係一個收費電視台睇左一個節目，係一隊叫AKB48的女子組合，佢地係日本係相當紅!! 因為內容唔錯，我一直追住收睇，不過可惜佢地只係買左第三同第四季就冇左果個節目，搞到我好冇癮。不過好彩，現代網路真係好發達，你想咩節目，基本係網路上面都搵得到，所以後來我咪日日係網上睇佢地來療傷囉!!
        有一天係網上面睇緊佢地演唱會直播，跟住佢地公佈會係4月會有個演唱會，地點就係武道館，當時我係諗住不如四月出發啦，可以順便睇櫻花一流，跟住又問係朋友有冇興趣去日本，又問下舊同學去睇櫻花有邊度好，結果就係佢地最後果場演唱會就快完結果陣，突然有嘢公佈，就係佢地會係六月會係日本橫濱足球場開佢地演唱會，令到我又驚又喜，話哂佢地都係第一次係噤果場去表演，仲要係第一個女子團隊係噤大果場去表演，咁我當然好想去啦!!所以咪由四月出發改左六月出發。
        跟住咪好似一般人咁去買下D旅遊書呀，又上吓網搵資料呀，開始計劃下去邊度邊度呀，又會問下人意見，睇下咁去會唔會好D呀，又會週圍搵吓旅行社有冇promotion，不過因為我朋友唔得閒，結果只係得一條友出發，不過講真，一條友去比較feel D，唔洗理會人地感受，又唔洗就住就住，計劃行程咪可以自由D。不過麻煩嘅就係去搵旅行社，主要係第一旅費就一定貴咗，因為通常一般旅行社都係做二人同行的自由行套票，再來就係冇人同你share間房(PS因為我睇過好多酒店單人房同雙人房價錢都差幾多吓，有D你一條友住一晚單人房價等於你同人share雙人房兩到三晚價錢，你都唔好話唔嗱舌)。我都搵左好多間旅行社，唔係價錢太貴，就係時間唔啱，好多都係做5day，講真，你去日本玩，冇返一星期，真係冇咩行過玩過，所以我下次決定咗再去日本，應該會留兩個星期，咁樣先會盡興!!
       之後我搵唔到套票啱買，咁係為有散訂機票加酒店啦，咁當然係會貴D，如果去D大間旅行社訂，價錢一定貴，咁就只有搵下D細間D旅行社去幫手訂啦，跟住當然去旺角銀行中心果D去問下啦，不過講真我上到去問過一間價錢又真係唔錯，剛剛好係我budget以內，不過問題係對佢地信心不足，因為後來睇左D投訴，所以諗一晚係放棄咗，跟住當我仲有一個月就出發果陣，我咪走好問相熟果間問下價錢，不過都係唔係太fit個價錢，之後我去上搵下一D訂酒店網格下價啦，心目中已經大約知道差不多果個價位。
       有一日我同個講開去日本D嘢果陣，佢話有一間相熟的旅行社訂機票同酒店都唔錯喎，跟住佢好快幫我去問下價錢，問完覆返來完全係一個好價錢，我諗咗幾日(PS其實係睇下仲有冇再平的方法，哈哈哈哈)，跟住就決定就幫襯佢，包括所有税項都係$7980！八千蚊都唔洗就可以玩九日，實在太抵！不過佢地會收咗錢先，先幫你訂所以嘢，果陣時我都有D擔心間嘢唔會會有問題呀！？不過我同事都幫襯過好次，我諗應該冇問題。跟住問完佢地攞咗戶口號碼之後，我就去銀行入數俾佢地，再同佢地打電話確實，跟住幾日後，打電話去問佢地book好哂未，當佢地搞點哂，佢地就會E-mail哂所有嘢，包括係e-ticket同酒店confirm booking，我當然就要睇吓有冇問題啦!所以我去用果張e-ticket去試下先，現在好多航空公司都有得俾你去confirm張飛票有冇問題，我今次選擇咗果間係叫達美航空的公司，我選擇佢地係有幾個原因，第一當然係價錢係直航機中最平，主要原因係佢地係一個美國航空公司，佢地最後目的地係美國，會係東京停留一陣，再轉飛去美國其他城市，所以會俾其他公司平$500-$1000左右。第二個原因係因為時間唔錯，佢地起飛時間係8:20AM，去到東京都係1:30左右(係當地時間)，所以去到酒店剛剛好係check in時間，時間冇咩浪費咗，不過你可能會問，點解唔搭零辰機，咁咪仲好，不過我本人覺得，係去玩就唔好攞苦來辛，去到咁早，有機會太早到埗，人地所有巴士地鐵都未開始有得比你搭，你咪有可能要係機場hea，咪一樣浪費時間，仲有就係我寧願係屋企睡多幾粒鍾都唔願意係飛機上面訓，因為起碼屋企訓一定舒適過飛機，回返果陣我又唔想太遲返到香港，因為我第二日要返工(因為本人大假唔係好多)，所以出發係星期六剛剛好唔洗返工，所以只係攞星期一至六(因為果個星期六公司係長週)，所以咪5日半假就可以出發玩九日!!第四就係你可以帶兩件23KG行李寄倉，因為我最近睇到有D航空公司開始收緊寄倉行李，所以如果去日本旅行的朋友，記得留意喱方面問題，咁就shopping的安心又放心啦!!第五就係佢地網站真係做得唔錯，坐位可能俾你早D選擇，餐飲可以俾你早D選擇，咁你check in就唔洗左搞右搞，仲有你可以輸入你電話同e-mail資料，佢地一有消息會即時通知，係網上check in咗，到時又會用短訊通知你，我就覺得唔錯，咁嘅價錢，做到大航空公司服務，我覺得真係唔錯!!(我都唔係好知佢地間公司係美國係咪好大間公司呀)
      酒店方面的選擇，我最主要係聽朋友及同事意見，佢地都推薦去住sunshine city(池袋)，主要係地點方便，交通四通八達，附近又好多嘢逛，隔離又有間好大的shopping mall，樓下又有間好大的便利店(真係好大)，所以唔怕落雨冇地方好逛啦!(不過本人唔知係咪天氣寶寶，結果係去九日,曬足九日,仲要係日本果邊都話係有史以來最冇雨的六月，因為六月佢地通常叫梅雨月)，結果本人就曬到變黑人返來，個個人都同我講你返來黑咗咁多，真係俾人吹漲 (*O*)
     今次講住咁多先,下次會開始有相同真係講返我係東京的所見所聞!希望大家有時間就睇下!!BYE!!